Evgeni Hvalkov
Unves Wulfa e Foxa go pa felda e en-vidi Asla. Sikom li es muy hunge, li desidi chi ta. Also Wulfa shwo a Asla:
"Audi ba, Gran Aur. Luy Mahantaa Leon, rega de bestia, he doi a mne raita de chi eni animal kel chi herba. Also sedey yu sal bi may deyfan.
"Bye hasti," shwo Asla. "Luy Mahantaa Leon, rega de bestia, he doni a me gardi-skriba kel bu lasi nul animal chi me”.
"Wo es it?" Wulfa kwesti perplexem.
"Es skriben pa may bake huf," shwo Asla gauravem. – “Si yu yao, talim-ney sinior, yu mog lekti it”.
"Brata Foxa," shwo Wulfa, "plis lekti skriba pa bake huf de Asla."
"Brata Wulfa," shwo durte Foxa kel samaji ke hir ye koy truk, - me’d lekti kun plesir, bat me he fogeti okula pa dom. Mogbi yu hi digni lekti? Yu es ya zuy talim-ney fon oli animal”.
Wulfa pri lauda de Foxa, lai a Asla e komandi ke ta lifti bake huf.
Asla lifti bake huf kun grave nal, e wen Wulfa begin shuki rega-ney skriba, Gran Aur ek-darbi ta bay huf an frenta, tanto fortem ke okos de Wulfa ausflui.
Walaa kwo eventi a wan kel es sinkuyde e pri lesta.
Unves Tigra lwo inu glube yama. Ta yo hampi shwo adyoo a jiva, bat un agrajen go pas.
"Hao jen," pregi Tigra, "austiri me!"
"Bat si me austiri yu," shwo agrajen, "yu chi me!"
"Non hi!" exklami Tigra. “Kasam do oli tigra-boh!”
Tigra fai zuy gro-ney kasam ke ta bu ve chi jen, e jen nichisi un gran balka inu yama. Tigra klimbi aus yama, kan jen e ek-lisi labas.
"Me he chi nixa yo duran dwa dey," shwo Tigra, "ewalaa deyfan pa selfa lai a me”.
"Bat yu he fai zuy gro-ney kasam!" jen exklami pa denada.
"Bat me hungi gro," Tigra grauli, "also kasam bu kaulu”.
"Nu findi ba koywan kel judi nu!" - shwo agrajen.
Eventi tak ke Foxa lopi pas.
"Rudish Mao," pregi agrajen, "fai ba juda inter me e Tigra!"
E lu rakonti olo a Foxa. Foxa skrapi baken aur bay bakpata.
"Komo hi mog-te Tigra lwo inu yama?" ta kwesti. – “Ob agrajen lugi? Ob es ver ke ta he tiri Tigra aus yama e salvi ta fon morte danja, al he mah ta fai zuy gro-ney kasam?”
Tigra e jen bu muvi pa weita.
"Me bu mog fai fin-ney judura til ke me vidi komo olo he eventi pa realitaa," Foxa shwo kun autoritaa. “Hay Tigra salti bak inu yama aus kel jen he tiri ta”.
Tigra bu mah li weiti longem e salti bak inu yama.
"Nau," shwo Foxa, "ambi jen e Tigra sta pa same halat kom bifooen. Yu, jen, si yu yao salvi Tigra snova, fidi ba suy kasam, yu hev raita de zwo to. E si yu bu fidi Tigra, yu hev raita de bu zwo to. Akti ba kom yu yao!”
Foxa ek-mavi kauda e lopi wek. Dankaful jen returni a dom e rakonti olo a suy molya e kinda. E kwo om Tigra? Tigra shayad haishi zai sidi in yama, si ta bu he morti.
Ye Kaval kel gro-envi Hiran, bikos ta fai fama kom zuy kway animal. Sikom Kaval bu mog fa-kompari kun ta, ta desidi kili ta. E ta shwo a Jen:
"Nu pa hunta kapti ba Hiran! Suy masu, derma e korna es muy valor-ney”.
"Komo hi nu ve zwo to?" - Jen fa-surprisi. – “ Hiran lopi muy kway. Bu por nixa oni nami ta Ajilgamba-ney”.
“Yu ve raidi me," shwo Kaval, "e tak nu ve kapti ta."
Also li zwo tak hi. Duran ol dey li shikari Hiran, bat bu mog ateni ta. Pa fin Kaval es fatigi-ney.
"Salti fon me," ta shwo a Jen.
"Non hi!” - Jen shwo. “Me bu es stupida! Nau me es yur masta. Yu ve hev brida sirkum galsa, muhka in muh, e me ve hev reina in handas e raidispika pa pedas. Depos nau yu ve servi a me e zwo olo ke me yao”.
Tak hi eventi a wan kel envi otres. Jenta ya shwo: "Bye kavi yama fo otra – yu selfa ve geti inu it."
Ye jen kel hev Doga e Asla. Ta gro-pri Doga e dulari ta, duran ke Asla mus-nem zwo mucho mushkile gunsa. Asla en-dumi:
"Way masta pri Doga gro e plei kun ta, duran ke me pai sol pena e bating? Way Doga jivi in dom, e me jivi in pashudom, way Doga chi fon tabla de masta, e me pai sol spika? Treba inventi dao fo mah ta favori i me”.
E undey, wen masta lai a dom, Asla mavi-mavi kauda kom Doga, brai (ta opini ke suy braisa es zuy hao musika), salti an masta, pon avangambas on masta-ney plechas, e begin lisi-lisi ta kom Doga zwo. Masta desidi ke Asla es pagal e mog kili ta bay huf. Kun pena ta librifi fon ta e tuy sendi Asla a kiliguan.
Walaa kwo eventi a wan kel envi otra e yao replasi ta bay swa.
Foxa e Kota en-go pa dale dao al he wadi mutu tu sta pa hunta, helpi mutu e parti ol kaptura pa brata-ney dao. Bat unves li miti pa shulin-borda den shikari-sha kun dogas. Es klar ke treba salvi swa. Foxa shwo:
"Brata Kota, me jan bao-si de truk e durtitaa. Lo shefe es tu sta pa hunta, dan nu duyfu se”.
"Brata Foxa," shwo Kota, "Me bu jan kwo ye in yur bao-si, bat me selfa jan un hi truk, e me sal utilisi it tuy”.
E Kota ek-klimbi un gran baum e ahfi swa miden lif.
"Es hao taim fo ofni bao-si de truk, Brata Foxa!" lu krai fon baum.
E Foxa lopi-lopi fon dogas tanto kway kwanto mog, e ta wud tabahi si ta bu wud vidi un dun in kel ta ahfi swa.
Wen ye es danja, iven zuy hao amiga oftem gadari!
Unves Wulfa kati-kili un yan e chi ta, bat ouran gloti un osta, e it fa-bloki in gorla. Wulfa yo hampi shwo adyoo a jiva, bat turan vidi un Leleka kel gauravem stepi-stepi budalem. Wulfa fa-lansi versu ta.
"Brata Leleka," pregi Wulfa raukem, "helpi me, leki me! Yu hev ya longe galsa e bik! Austiri ba osta fon may gorla!”
"E yu bu loskusi may kapa?" - Leleka kwesti suspektem.
“Pa nul dao!” - Wulfa shwo. – “Kontrem, me sal pagi hao pur leking! Me sal dai a yu un sak de golde moneta pur to!”
Leleka kredi ta, sovi kapa inu muh de Wulfa, e tiri osta aus.
"Rrrrrr!" - Wulfa grauli. "Tungi gro! Nau yu sal pagi bay yur jiva por tal tunga!”
"Komo?" shwo Leleka. – “Me he leki yu! E yu he wadi a me den sak de golde moneta kom paga…”
"Wel, kan ba sey leleka!" Wulfa exklami. "Ta hampi kili me, e ta yoshi demandi paga! Mah swa wek fon hir, otrem me kili yu!"
Walaa komo koys danki por lo hao!
Undey Leon, Wulfa e Foxa go shikari a blise vilaja e pai un gova, un yan e un kok. Wen taim fo dividi kaptura lai, Leon he yo chi gova e yao pyu masu. Wulfa shwo:
"Hay Leon pai gova, me pai yan, e Foxa pai kok."
Leon bu pri tal worda e ek-darbi Wulfa bay pata tak ke wektori ol suy kapa-derma. Dan Foxa begin dividi kaptura. Ta shwo:
"Hay Leon pai gova, Leon pai yan, e Leon pai kok."
"Hu es toy wan kel he talimi yu tu dividi kaptura tanto sajem?" - kwesti Leon.
"Yur mahantaa, es sey sinior in rude shapa," shwo Foxa al indiki Wulfa.
Unves Foxa klimbi inu un de dwa dalwa kel stan on kwan. Ambi dalwa es konekten bay korda. Ouran dalwa kun Foxa lwo inu kwan. Ta yo hampi shwo adyoo a jiva, bat Wulfa lopi pas.
"Hey, Brata Foxa, kwo yu zwo dar?" - Wulfa kwesti jigyas-nem.
"Me fishi, Brata Wulfa! Hir pa diba ye menga de hao fish," shwo Foxa.
“Ver ku?” Wulfa ek-lisi labas avidem. – “Komo me toshi mog geti adar?"
"Es ga fasile," shwo durte Foxa, "salti ba inu dalwa kel pendi uuparen."
Wulfa en-joi e salti inu dalwa, e sikom ta es pyu grave kem Foxa, dalwa kun Wulfa nichifi a diba, duran ke dalwa kun Foxa uuparifi.
“Me tamani a yu hao fishing!” - Foxa krai fon uuparen. "E shwo ba saluta a kisanes wen li lai!"
https://en.wikipedia.org/wiki/Lingwa_de_planeta
http://www.lingwadeplaneta.info/en/index.shtml
Fables About Animals | Alrond and the Magic Fox | The Second Wish
[top]
You can support this site by Buying Me A Coffee, and if you like what you see on this page, you can use the buttons below to share it with people you know.
If you like this site and find it useful, you can support it by making a donation via PayPal or Patreon, or by contributing in other ways. Omniglot is how I make my living.
Note: all links on this site to Amazon.com
[top]
